Willy Weerman, oeze taolschulte veur de gemiente Börger-Oring, wil nao 12 jaor het stokkie overdragen an een aander. Dus nou bin we bij het Huus van de Taol op zuuk naor een neie taolschulte!

Dizze ambassadeur vertegenwoordigt oes in de gemiente Börger-Oring en organiseert activiteiten zoas het veurlezen op basisschoelen in de meertmaond-streektaolmaond en onderholdt de contacten met de gemiente.  Vanzölf döt de taolschulte dit niet allenig; zij/hij wordt hierbij holpen deur aandere vrijwilligers uut de gemiente. Wiedere activiteiten op streektaolgebied wordt deur dizze groep zölf bedacht en uutvoerd.

Wie drag de streektaol net zo'n warm hart toe as Willy? Wie wilt 't stokkie van hum overnimmen en der veur zörgen daw deurgaot met de mooie dingen die as we in de gemiente Börger-Oring doet?

Veur meer informatie kuj bellen met oeze directeur Renate Snoeijing op 0593 -371010.

Bi'j cultuurmaker in ien van de 5 noordelijke previncies (Grunning, Fryslân, Drenthe, Overiessel en Gelderland) en hej een preject op het gebied van streekmeertaligheid? Let dan nou goed op! 

De Proeftuun Meertaoligheid gef je de meugelkheid um een mooi project in te dienen veur een publieksvriendelijk, interprovinciaal cultuurproject waorin streekmeertaoligheid een belangrieke rol speult. Het ministerie van OCW hef veur dit jaor € 220.000 beschikbaar steld um dizze streekmeertaoligheid te bevordern!

Lek het je wal wat um hieran met te doen? Kiek dan hier veur meer informatie!

 

De inschrieving veur de Streektaolstried in de gemeinte Tynaorl is lös! Op vrijdagaovend 20 meert um 20.00 uur begunt dizze Drèentse pubquiz bie café Hingstman in Zeijen. Hej een team van 4 of 5 man/vrouw, dan kuj je opgeven deur een mailtie te sturen naor Dit e-mailadres wordt beveiligd tegen spambots. JavaScript dient ingeschakeld te zijn om het te bekijken.. Der is stee veur 25 teams.

De vraogen gaon neit allent over de streektaol. Het geit ok over historie en cultuur van de gemeinte. Het team met de meiste punten nao acht rondes van 8 vraogen, is winnaor en mag zuch een jaor laang het beste streektaolteam van de gemeinte Tynaorl nuimen.

 

Zesentwintig groepen bestaonde oet veer of vief personen, allemaol ofkomstig oet de gemeente Aa en Hunze, bonden 24 jannewaori in Grand Café Hofsteenge in Raol met mekaor de stried an om de fel begeerde trofee die te winnen was tiedens de eerste ‘Streektaolstried’ .

De ‘Streektaolstried’ is een quiz die geheuil in de Drèentse taol holden wordt. De organisaotsie lig in handen van de vertegenwoordigers oet de gemeente Aa en Hunze van het ‘Huus van de Taol’: de Taolschulte en zien Keurnoten.
In aacht rondes met aal aacht opdrachten muzzen de groepen zuch bugen over de vraogen die onder meer betrekking hadden op de Drèentse taol, cultuur, geschiedenis en muziek.

De prissentaotsie van dizze aovond was in goeie handen van Jan Germs, old-directeur van het ‘Huus van de Taol’ in Beilen, die naost de vraogstelling een schat an mooie infermaotsie deurgaf an de deeilnimmers over de provincie Drenthe in al zien facetten.

An het èende van de aovond gungen, nao een spannende stried, vief inwoners oet Aomen en Ieghaor, onder de noemer ‘de Broekstreek’ der met de pries vandeur.
Behalve de wisseltrofee weurden ze alle vief eigenaor van een staopel mooie Drèentse boouken.

Het volk in de zaol was slim bliede met dizze aovend. Taolschulte, Jan Hartlief, beloofde dat het niet bij dizze ene keer blieven zal. Aander jaor is der ok een 'Streektaolstried’ in Aa en Hunze.

Op de foto (Gea Aling): v.l.n.r.
Bert Jagt, Jan Vrijs, Geke Wolf, Henk Wolf, Janny Jagt

 

 

Neisgierig naor hoe je Drèents klinkt? De app van WoordWaark kan an de hand van je uutspraak veurspellen waor aj vort komt binnen het Nedersaksische taolgebied! Je huuft allent maor an te geven hoe aj een tiental woorden uutspreken zult in je eigen streektaol. En de app warkt veur het Drèents, Grunnegs en de aandere varianten van het Nedersaksisch die proot wordt in Nederland. Volg de stappen en doe met!

  1. Gao naor WoordWaark en start de kwis
  2. Kies veur elk woord de variant die het dichtst bij je eigen uutspraak ligt. Deur links op de play-button te klikken, kuj de variant ok afspeulen. Deur links op het vinkje te klikken, kuj de variant kiezen die aj zölf het meeste gebruukt.
  3. Maak een opname van je eigen uutspraak deur op het microfoontie te klikken. Druk op 'volgende' as de opname goed lukt is.
  4. Herhaal stap 2 en 3 veur alle tien de woorden.
  5. Vul je leeftied en geslacht in en gao deur naor de veurspelling.
  6. Op de kaort wordt angeven waor de app denkt daj vort komt. Links staot de drie plaotsen die het miest veur de hand ligt.
  7. Belangriek: selecteer op de kaort waor aj écht vort komt (ok as de veurspelling klopt) en druk op versturen. Zo kan WoordWaark de veurspellingen in de toekomst verbetern.

 

Stief bedankt veur het metdoen!

'Woordwies' is der! De Nedersaksische app is deur Hendrik Jan Bökkers in warking steld. In het gebouw van RTV Drenthe stiet een grote smartphone. Nao een druk op de knop kun Hendrik Jan het spel speulen.

'Woordwies' is ontwikkeld door de saomenwarkende streektaolorganisaties van Grunnen, Drenthe, De Stellingwarven, West-Oaverijssel, Twente en de Achterhoek.  
In de app een taolspellegie in de verschillende varianten en het neis vanoet de regio's.

Dizze app is gratis en te downloaden in de google playstore en via de App store van Apple.

Hej wal ies speuld met de gedachte um zölf een toneelstuk te schrieven? Of een musical? Of een revue?

Dan kuj begun aander jaor an de slag!

Het Huus van de Taol neugt je geern veur de cursus Ienakter schrieven in vief lessen en wal op 
za 18 januari van 10 - 13 uur les 1
za 1 februari van 10 - 13 uur les 2
za 15 februari van 10 - 13 uur les 3
za 14 maart van 10 - 14.30 uur les 4 met lunch
za 4 april van 10 - 14.30 uur les 5 met lunch
Metdoen an dizze cursus kost 75,- euro, inclusief koffie/ thee en cursusmateriaal.
De leste twei keer is een lunch inbegrepen. Anmelden kan bij het Huus van de Taol: Dit e-mailadres wordt beveiligd tegen spambots. JavaScript dient ingeschakeld te zijn om het te bekijken.

Schrief een kört verhaal in het Drents of een aandere variant van het Nedersaksisch en maak kans op een mooie pries: € 350,--! Het thema is 'Vrij?' en je verhaal mag maximaal 1.000 woorden wezen. Inlevern veur 10 januari via Dit e-mailadres wordt beveiligd tegen spambots. JavaScript dient ingeschakeld te zijn om het te bekijken..

 

Pagina 1 van 56