Meer promotie - Huus van de Taol

Veurige week donderdag was de leste aovend van de Moi-cursus in Balinge. De elf cursisten én docent Hennie Enting hadden der veul aordigheid an um drie aovends mit het Drents in de weer te wezen. Lichtkaans gaot ze later in het jaor nog wieder met de Drenthe-cursus.

Willy Weerman, oeze taolschulte veur de gemiente Börger-Oring, wil nao 12 jaor het stokkie overdragen an een aander. Dus nou bin we bij het Huus van de Taol op zuuk naor een neie taolschulte!

Dizze ambassadeur vertegenwoordigt oes in de gemiente Börger-Oring en organiseert activiteiten zoas het veurlezen op basisschoelen in de meertmaond-streektaolmaond en onderholdt de contacten met de gemiente.  Vanzölf döt de taolschulte dit niet allenig; zij/hij wordt hierbij holpen deur aandere vrijwilligers uut de gemiente. Wiedere activiteiten op streektaolgebied wordt deur dizze groep zölf bedacht en uutvoerd.

Wie drag de streektaol net zo'n warm hart toe as Willy? Wie wilt 't stokkie van hum overnimmen en der veur zörgen daw deurgaot met de mooie dingen die as we in de gemiente Börger-Oring doet?

Veur meer informatie kuj bellen met oeze directeur Renate Snoeijing op 0593 -371010.

 

 

 

 

 

 

 

Goed neis veur schriever Anne Doornbos! Zien Drèentstaolige thriller De Paddenvanger hef zo goed verkocht, daw der een tweede druk van maakt hebt. 

Hej dit spannende boek, dat zuch ofspeult in de omgeving van Raol, nog niet lezen? Bestel hum dan rap in oeze webhop!

Bi'j cultuurmaker in ien van de 5 noordelijke previncies (Grunning, Fryslân, Drenthe, Overiessel en Gelderland) en hej een preject op het gebied van streekmeertaligheid? Let dan nou goed op! 

De Proeftuun Meertaoligheid gef je de meugelkheid um een mooi project in te dienen veur een publieksvriendelijk, interprovinciaal cultuurproject waorin streekmeertaoligheid een belangrieke rol speult. Het ministerie van OCW hef veur dit jaor € 220.000 beschikbaar steld um dizze streekmeertaoligheid te bevordern!

Lek het je wal wat um hieran met te doen? Kiek dan hier veur meer informatie!

 

A moi LOOS!-kieker,

Loos 2019 RTV Drenthe Huus van de Taol

Wat mooi daj even bij oes op de webstee komt. Hef LOOS! je interesse veur het Drèents anwakkerd of weer wakker maakt?

Huus van de Taol

As Huus van de Taol holdt wij oes bezig met de Drèentse streektaol. Oeze missie is körtweg: het stimuleren van het Drèents deur een hiele koppel activiteiten te doen. Oeze taol is een mandielig bezit waor wij met mekaor zunig op weden moet. En wij vindt het daorum ok hiel mooi daj ies bij oes op de webstee kieken komt!

Waw doet

Wieder organiseert we een koppel activiteiten op het gebied van de Drèentse taol. In oeze agenda kuj precies zien wat of der te doen is de ankommende tied. 

Op dizze webstee kuj van alles vinden over waw doet. Maar stiet wat aj zuukt der nou niet tussen of kuj 't zo rap niet vinden? Bel oes dan even op 0591-371010.

Logo Wies met Drents

 

 

 

 

 

 

Liedties van maximaal ien minuut, in het Drents en akoestisch uut te voeren: dat bint de Stoplochtsessies. Oj al lang in de muziek bezig bint of net komt kieken, dat mak niks uut. Gao de uutdaging an, maak een demo en stuur die veur 1 april 2020 op!  De tien beste liedties wordt openeumen en uutezunden op TV Drenthe.

Waor mut je lied an voldoen?

  • De groep die as het zingt bestiet uut maximaal vief personen.
  • Het is een Drentstalig lied.
  • Je lied duurt maximaal ien minuut.

Aj hulp neudig bint kuj dat veur 1 meert 2020 angeven bij het Huus van de Taol. Stuur je demo naor Dit e-mailadres wordt beveiligd tegen spambots. JavaScript dient ingeschakeld te zijn om het te bekijken.

Zet in je mail de volgende gegevens: de naam van de uutvoerende groep/artiest, de naam van het liedtie en je contactgegevens.

Luustern naor gedichten, verhaolen en meziek in de streektaol. En dan in de pauze lekker dikdakken in een schier restaurant in Drenthe. Dat is Taal an Taofel.

ZUNDAG 9 FEBREWARI 11.00 UUR
Zaolencentrum Wielens in Noord-Slien.

Poëzie: HENK HOOIJER. Proza: ABEL DARWINKEL.
Meziek: ANNEMIEK DRENTH & MARK KIERS
Opgave: Reina Zwiers: 0591-362371; Dit e-mailadres wordt beveiligd tegen spambots. JavaScript dient ingeschakeld te zijn om het te bekijken.

De inschrieving veur de Streektaolstried in de gemeinte Tynaorl is lös! Op vrijdagaovend 20 meert um 20.00 uur begunt dizze Drèentse pubquiz bie café Hingstman in Zeijen. Hej een team van 4 of 5 man/vrouw, dan kuj je opgeven deur een mailtie te sturen naor Dit e-mailadres wordt beveiligd tegen spambots. JavaScript dient ingeschakeld te zijn om het te bekijken.. Der is stee veur 25 teams.

De vraogen gaon neit allent over de streektaol. Het geit ok over historie en cultuur van de gemeinte. Het team met de meiste punten nao acht rondes van 8 vraogen, is winnaor en mag zuch een jaor laang het beste streektaolteam van de gemeinte Tynaorl nuimen.

 

In 'Assen Auschwitz Assen' hef Martin Hiemink de herinnerings van Netty Lezer (1918) op papier ezet. Netty Lezer was de dochter van een koosjere slager in Assen. Nao de Duutse inval stund de wereld van de familie op de kop. Het leven wordde steeds moeilijker en op 2 oktober 1942 wordden alle joden in Assen opepakt en naor kamp Westerbork en wieder, ofevoerd. Netty was daor ook bij.
Hoe zij heur fijne jeugd in Assen beleefde en wat zij nao de deportatie mitmaakte in de kampen van Auschwitz en Bergen Belsen, en wat dat verder veur invloed had op heur leven, is te lezen in dit eerlijke boek.

Het boek is te bestellen bij drentheboeken.nl of te koop bij het Huus van de Taol in Beilen.

Pries: € 5,- (excl. bezorgkosten)

Zesentwintig groepen bestaonde oet veer of vief personen, allemaol ofkomstig oet de gemeente Aa en Hunze, bonden 24 jannewaori in Grand Café Hofsteenge in Raol met mekaor de stried an om de fel begeerde trofee die te winnen was tiedens de eerste ‘Streektaolstried’ .

De ‘Streektaolstried’ is een quiz die geheuil in de Drèentse taol holden wordt. De organisaotsie lig in handen van de vertegenwoordigers oet de gemeente Aa en Hunze van het ‘Huus van de Taol’: de Taolschulte en zien Keurnoten.
In aacht rondes met aal aacht opdrachten muzzen de groepen zuch bugen over de vraogen die onder meer betrekking hadden op de Drèentse taol, cultuur, geschiedenis en muziek.

De prissentaotsie van dizze aovond was in goeie handen van Jan Germs, old-directeur van het ‘Huus van de Taol’ in Beilen, die naost de vraogstelling een schat an mooie infermaotsie deurgaf an de deeilnimmers over de provincie Drenthe in al zien facetten.

An het èende van de aovond gungen, nao een spannende stried, vief inwoners oet Aomen en Ieghaor, onder de noemer ‘de Broekstreek’ der met de pries vandeur.
Behalve de wisseltrofee weurden ze alle vief eigenaor van een staopel mooie Drèentse boouken.

Het volk in de zaol was slim bliede met dizze aovend. Taolschulte, Jan Hartlief, beloofde dat het niet bij dizze ene keer blieven zal. Aander jaor is der ok een 'Streektaolstried’ in Aa en Hunze.

Op de foto (Gea Aling): v.l.n.r.
Bert Jagt, Jan Vrijs, Geke Wolf, Henk Wolf, Janny Jagt

 

 

Pagina 1 van 97